Azərbaycan Respublikası Səhiyyə Nazirliyi 2 nömrəli Bakı Baza Tibb kollecində 10 may 2024-cü il tarixində Müasir Azərbaycanın qurucusu ulu öndər Heydər Əliyevin anadan olmasının 101-ci ildönümünə həsr olunan tədbir keçirilib.

Tədbirdə kollecin rəhbərliyi, müəllim-tələbə heyəti iştirak edib.
Azərbaycan Respublikası Dövlət Himni ilə başlanan tədbirdə torpağımızın ərazi bütövlüyü uğrunda gedən döyüşlərdə canlarından keçən şəhidlərimizin əziz xatirəsi bir dəqiqəlik sükutla yad edilib.

Tədbir Azərbaycan Respublikası Səhiyyə Nazirliyi 2 nömrəli Bakı Baza Tibb kollecinin Yeni Azərbaycan Partiyası Ərazi İlk Partiya Təşkilatinin sədri Gülər Qulu-zadənin geniş məruzəsi ilə açılıb: "Heydər Əliyev Azərbaycanın müstəqilliyinin təməlini yaradıb, daha sonra isə onu qoruyub, saxlayıb və davamlı inkişaf yoluna çıxarıb. Qurucu və xilaskar dövlət xadimi kimi əbədilik qazanıb. O, böyük tarixi şəxsiyyət, dövlətçilik ənənələrini layiqincə davam etdirən və daha da zənginləşdirən dahi rəhbər olub."

Sonra Yeni Azərbaycan Partiyası Ərazi İlk Partiya Təşkilatının üzvlərinin "Heydər Əliyevin təhsildə və səhiyyənin inkişafında rolu, Heydər Əliyevin gənclər siyasəti" mövzusunda geniş məruzələri dinlənilib. Ulu Öndər Heydər Əliyevin həyat və fəaliyyətindən bəhs edən videoçarxın nümayiş ilə davam edən tədbir Tələbə Həmkarlar İttifaqı Komitəsinin və Tələbə Gənclər Təşkilatının birgə hazırladığı ədəbi-bədii kompozisiya ilə yekunlaşıb.